Shtëpi Lajme Sonila Meço reagon pas fjalës së mirditores në Kuvend: Dhitë e saj...

Sonila Meço reagon pas fjalës së mirditores në Kuvend: Dhitë e saj janë të vërteta

Shperndaje në Facebook.

Sonila Meço ka reaguar pas fjalës së mirditores Gerta Lokut në Kuvendin e Shqipërisë, fjalë e cila shkaktoi lot e duartrokitje të sinqerta mes deputetësh.

Me anë të një statusi në Facebook, Sonila Meço shkruan se fjala e Gertës ishte e sinqertë por zhgjodhi vendin e gabuar për t’a thënë.

“Sikur Gerta të kish folur në tjetër sfond, për një tjetër audiencë, lagur veç nga djersët e punës e mbathur veç me krenarinë e çfarë ka arritur e refuzim të pranimit të realitetit siç është, fjalët e saj nuk do shkaktonin këtë ndarje.

Do dëgjoheshin për realitetin e hidhur që bartin, të vërtetën e madhe që klithin zanoreve, zemëratën e papërmbajtshme që do rrëzonte çdo qeveri, frymëzimin e jashtëzakonshëm që sot do kish nxjerrë njerëzit në rrugë”- shkruan Sonila Meço në Facebook.

Postimi në Facebook.

Nga foltorja e kuvendit kanë folur të zgjedhur e të pazgjedhur prej nesh, të shkolluar e të padiplomuar, të ndershëm e kriminelë, viktima e xhelatë, të mençur e të pazotë.

Nga ajo foltore janë artikuluar 27 vite tranzicion shqiptar, i dhimbshëm, përjashtues, vrastar, denigrues, i padrejtë, zaptues, shkatërrues, i ashpër e dhunues.

Ndaj ngjan bast i humbur pritshmëria e një të vërtete të madhe, mbijetuese, çarmatosëse e triumfuese kumtuar nga ajo foltore.

Kush guxoi, nuk është më aty, kush provoi u baltos, kush rezistoi u përshtat.

Për këtë fjalimi i ndjerë i Gertës me atë sfond e audiencë, lagur me lot e mbathur me lutje bën zhurmë.

Zhurmë herë frymëzuese e herë konspirative. Sepse kush hyn aty ka mallkimin e paragjykimit si hyri, pse dhe në emër të çfarë. Ka kohë që aty nuk hyjnë të zgjedhurit prej nesh, a ndoshta nuk kanë hyrë kurrë.

Sikur Gerta të kish folur në tjetër sfond, për një tjetër audiencë, lagur veç nga djersët e punës e mbathur veç me krenarinë e çfarë ka arritur e refuzim të pranimit të realitetit siç është, fjalët e saj nuk do shkaktonin këtë ndarje.

Do dëgjoheshin për realitetin e hidhur që bartin, të vërtetën e madhe që klithin zanoreve, zemëratën e papërmbajtshme që do rrëzonte çdo qeveri, frymëzimin e jashtëzakonshëm që sot do kish nxjerrë njerëzit në rrugë.

Ja që sot fjalët e Gertës, një gruaje ndërtuar vetë e sakrificash janë status facebook-u, instagrami, tweeter-i dhe jo një revolucion rrënjësh. Këtë më mirë se kushdo e di Gerta që foli nga kuvendi, vendin që shpërfillet, fyhet e denigrohet nga ata që kanë në dorë fatet e vendit.

Ne, populli të rrjeteve sociale.

Dhitë e Gertës janë të vërteta, ç’do bëjmë me veten avatar?